Nagpahayag sang kabalaka si Preisdent Ferdinand Marcos Jr. may kaangtanan sa nagapadayon nga kinagamo sa Senado, lakip na ang insidente sang ginatudlo nga shoot out, walkout sang minority bloc, kag alegasyon sang isa naman ka Senate coup.
Suno sa Presidente, makaluluoy na ang kahimtangan sang Senado kun ikumparar sang tion nga isa pa siya ka senador.
Ginpahayag niya nga sang una, bisan mabaskog ang mga debate kag indi magpareho ang mga panan-aw sang mga senador, nagapabilin gihapon ang respeto kag propesyonalismo sa tunga nila.
Dugang pa ni Marcos, sadto wala ginapersonal sang mga senador ang ila mga diskusyon kag mas ginahatagan bili ang maayo nga deliberasyon para sa interes sang pumuluyo.
Apang sa subong, nagapakita sang mas mabudlay nga sitwasyon ang Senado bangud sang nagadamo nga kontrobersya kag tensyon sa sulod sini.
Wala naman nagpahayag sang dugang nga detalye ang Malacañang bahin sa mga alegasyon, apang ginapaabot nga magapadayon ang mga diskusyon may kaangtanan sa kahimtangan kag kredibilidad sang Senado sa pihak sang nagaluntad nga mga isyu.
