Nagpahanumdom ang Department of Energy (DOE) sa publiko nga ginapahanugutan gihapon ang pagbakal sang mga produktong petrolyo gamit ang fuel-grade nga drum ukon iban pa nga containers, basta lehitimo ang paggamit kag nasunod ang mga safety standards sa pagdispense sang fuel.
Suno sa ahensya, kasagaran ini nga pamaagi ginahimo sang mga sektor nga nagakinahanglan sang maramihan nga suplay sang langis para sa ila operasyon. Lakip diri ang mga bangkang pangisda, marine equipment operators, sea transport services, mga ospital nga nagaandar sang generator sets, kag mga Local Government Units (LGU). Ginagamit man ini sang mga naga-operate sang agricultural machinery, telecommunications facilities, port transport units, kag iban pa nga negosyo nga may lehitimo nga kinahanglanon sa fuel.
Apang ginpabug-atan sang DOE nga ang kadamuon sang ginabakal nga petrolyo dapat nagaangay lamang sa normal nga konsumo kag aktwal nga kinahanglanon sang operasyon sang buyer.
Kon ang kadamuon sang ginbakal nga produkto sobra ukon indi na angay sa kasagarang pattern sang pagbakal, mahimo ini nga usisahon sang mga otoridad agud masiguro nga wala sang nagakatabo nga paghoard ukon ilegal nga pagtago sang suplay.
Ginlaygayan man sang DOE ang mga fuel retailers nga mangin mabinantayon sa pagproseso sang amo nga mga transaksyon, labi na kon ang volume sang ginabakal indi nagaangay sa ginpahayag nga katuyuan ukon konsumo sang mamimili.
Sa pihak nga bahin, ginahingyo sang ahensya sa publiko nga ireport ang bisan ano nga kahina-hinala nga transaksyon paagi sa eGovPH App, Hotline 8888, sa mga LGU, ukon direkta sa Consumer Welfare and Promotion Office sang DOE pinaagi sa ila telepono, email, ukon opisyal nga social media channels.
