Nakasulod na sa Round of 16 ang pambansang koponan sang France sa padayon nga FIFA World Cup 2026 matapos nila mapirde ang Sweden, 3-0, sa Round of 32 nga ginhiwat sa New Jersey Stadium.
Gindominar sang Les Bleus ang hampang halin pa sa nauna nga bahin sang kompetisyon.
Ginbuksan ni Kylian Mbappé ang iskor sa ika-45 minuto pinaagi sa madasig nga sipa halin sa wala nga bahin sang penalty area.
Sa ikaduha nga bahin sang hampang, labi pa nga naglapad ang abanse sang France sang nakasuksok sang bola si Bradley Barcola sa ika-52 minuto pinaagi sa assist ni Michael Olise.
Ginselyuhan sang France ang ila kadalag-an sa ika-74 minuto sang nakaiskor liwat si Mbappé pinaagi sa pasa ni Olise, nga naghatag sa iya sang ikaduha nga goal ukon brace sa amo nga hampang.
Bangud sini, nagsaka na si Mbappé sa ikaduha nga puwesto sa all-time leading scorers sang FIFA World Cup nga may 18 ka goals, isa na lang ka goal ang kulang agud maangkon ukon malampuwasan ang rekord ni Lionel Messi.
Dugang pa sini, uyat man niya ang bag-o nga rekord bilang manugbaskog sang pinakadamo nga goals sa knockout stage sa maragtas sang torneo, nga may kabug-usan nga 10 ka goals.
Sunod nga makaatubang sang France ang koponan sang Paraguay sa Hulyo 4 para sa Round of 16.
