Sa gitna ng umiinit na alitan sa Senado, umapela si CIBAC Party-list Rep. Eddie Villanueva sa kanyang anak na si Sen. Joel Villanueva na magpasya batay sa konsensya at pananampalataya, at hindi sa impluwensiya ng mga kaalyado o political blocs.
Ayon sa nakatatandang Villanueva, hindi maiiwasan sa pulitika ang magkakasalungat na interes at pressure mula sa iba’t ibang grupo. Kaya mas mahalaga raw na manatili ang isang mambabatas sa sariling paninindigan, kahit pa hindi nito mapasaya ang lahat.
Lumabas ang panawagang ito habang pinag-uusapan pa rin sa Senado ang tensyon sa liderato at posibleng special session na maaaring ipatawag ni Pangulong Ferdinand Marcos Jr. Isa ito sa mga hakbang na tinitingnan upang maayos ang hindi pa natatapos na isyu sa organisasyon at pamumuno ng Mataas na Kapulungan.
Sa kasalukuyang sitwasyon, napapansin ding iisa pa lamang sa grupo ni Sen. Alan Peter Cayetano ang hayagang nagsasabing handang dumalo sa posibleng special session. Patuloy pa ring nakabinbin kung ang ganitong hakbang ay makakatulong sa pagresolba ng banggaan sa loob ng Senado o lalo lamang magpapakita ng hati-hating posisyon sa loob ng kapulungan.
