Nagpatuman sang blue alert status ang Department of Social Welfare and Development (DSWD) samtang ginamonitor ang bag-ong tropical cyclone nga may international name nga Saudel, nga posible makasulod sa Philippine Area of Responsibility (PAR) subong nga Lunes sa pinakauna.
Ginpaidalom ini sa blue alert matapos ginpaubos sang National Disaster Risk Reduction and Management Council ang alert status halin red ukon pinakamataas pakadto sa blue ukon standby sang Huwebes sang gab-i.
Sa idalom sang blue alert, padayon nga ginamonitor sang DSWD ang dalan sang bagyo kag kahimtangan sang mga lugar.
Ginapreparar man ang relief goods kag Family Food Packs (FFPs) sa mga bodega, samtang nagakoordinar ang mga response team sa lokal nga mga lider para sa madasig nga paghatag sang bulig kun kinahanglan.
Suno kay DSWD spokesperson Irene Dumlao, padayon ang pagbantay kag koordinasyon sang ahensya sa mga lokal nga panguluhan kag iban nga ahensya sang gobyerno bangud sa epekto sang nagligad nga mga bagyo kag nagbaskog nga habagat.
May yara ang DSWD sang sobra 3.7 milyon ka kahon sang Family Food Packs nga nakaprepar sa nagkalain-lain nga strategic hubs sa bug-os nga pungsod.
May yara man sila sang masobra ₱667 milyon nga standby funds para sa posible nga pagresponde sa kalamidad.
Ginpahanumdom ni Dumlao ang publiko nga magprepar kag magbantay sa posible nga pagbaha kag landslide, ilabi na samtang ginamonitor ang bag-o nga weather disturbance.
