KORONADAL CITY – Pormal na nga nagsang-at sa korte sang kaso nga Reckless Imprudence Resulting to Homicide ang pamilya sang isa ka 1 year old nga bata sa driver nga aksidente nga nakabunggo-patay sa biktima sa bahin sang Waling-waling St., atubangan lamang sang Rizal Park, Brgy. Zone 4, Koronadal City sang Biyernes nga adlaw, Hunyo 24 2022.
Ini ang ginkumpirmar ni PMSG Gandy Basan, investigator sang City Traffic sa nterview sang Bombo Radyo Koronadal.
Suno sa imbestigador, desidido na ang pamilya sang bata nga pasakaan sang kaso ang driver bangud sa nadangtan sang makaluluoy nga biktima.
Madumduman nga sa imbestigasyon sang mga otoridad nga wala nabatyagan sang iloy sang biktima nga nagabakal sang bulak nga naghalin sa tupad sini ang iya bata kag nagpadulong sa dalan nga kaingod lamang sang isa ka flower shop didto.
Nagdalagan padulong sa dalan ang bata nga babaye apang nadasma ini kag tiyempo nga nag-agi ang isa ka Strada pick-up rason nga nabungguan ini kag aksidente pa nga nalapakan sang royda.
Nadala pa sa South Cotabato Provincial Hospital ang bata apang, gindeklarar nga dead on arrival na ini sang doktor.
Kaangot sa ginhimo sang pamilya, kinamatarong naman sang driver nga depensahan ang iya kaugalingon sa korte.
Samtang, nagapabilin naman ang suspek sa lock up cell sang Koronadal City PNP.
