Ginbuyagyag ni anay Senador Antonio “Sonny” Trillanes IV sa House Justice Committee sang Miyekules, Abril 22, 2026 ang P181.6 milyon nga mga bayad sa gina-alegar nga ginpadala sang drug lord nga si Samuel “Sammy” Uy.
Ginpabug-atan ni Trillanes nga nagpadala si Uy usar ang cashier’s kag personal checks sa nagkalain-lain nga miyembro sang pamilya Duterte halin 2011 tubtob 2013.
Lakip sini ang P22.32 milyon para kay VP Sara Duterte, P51.58 milyon para kay Davao City Mayor Sebastian Duterte, P38.81 milyon para kay Rep. Paolo Duterte, P53.28 milyon para kanday Honeylet Avanceña, common-law wife ni FPRRD kag Kitty Duterte, kag P15.66 milyon para kay anay Presidente Rodrigo Duterte.
Ginpahayag ni Trillanes nga konektado si Uy kay Michael Yang, ang anay economic adviser ni Duterte nga imbolbado sa Pharmally kag POGO scandals, kag isa sa mga nagapanguna nga donor sa kampanya ni Duterte sang 2016.
Ginbuyagyag man ni Trillanes nga may joint bank account ang VP Sara kag ang iya amay nga nagabalor sang P2.4 bilyon halin 2003 tubtob 2016, kag wala ini gindeklarar sa iya SALN nga mga transaksyon nga nagalab-ot sa P111.63 milyon.
Suno kay Trillanes, ini nga mga butang amo ang mga impeachable offense suno sa Saligang Batas.
