Ginpanindugan ni former South Cotabato 2nd District Representative Dr. Peter Miguel nga indi dapat mangin isyu kun madamo sa mga empleyado sang Koronadal City Hall ang mga anay niya nga trabahante, bangud mas importante ang ila ikasarang kag performance sa pagserbisyo.
Sa interview sang Bombo Radyo Koronadal, ginpahayag ni Miguel nga wala sang malain kun ang mga nagatrabaho subong sa city hall ang halin sa iya anay nga grupo, bangud indi man dapat gamiton nga basehan sa pagbaton sang empleyado ang ila politikal ukon propesyonal nga kaangtanan sa nagligad nga administrasyon.
Suno kay Miguel, ang rason nga nagapabilin sa city hall ang pila sa iya anay nga mga trabahante amo ang ila maayo nga performance kag kalidad sang pagtrabaho, nga natalupangdan man ni City Mayor Erlinda Araquil.
Dugang pa niya, wala man ini nangin problema sa alkalde bangud wala sang daku nga lapses ukon negatibo nga epekto sa operasyon sang lokal nga gobyerno nga resulta sang pagserbisyo sang nasambit nga mga empleyado.
Ginadayaw man ni Miguel si Mayor Araquil bangud sa iya ikasarang sa pag-evaluate kag pagkilala sang mga empleyado nga may maayo nga performance kag kontribusyon sa city hall.
Ginpabutyag pa sang anay mambabatas nga nagapakita ini nga kabalo ang alkalde magdumala sang mga personnel kag magpatuman sang iya mga programa para sa kaayuhan sang Koronadal City.
