Ginpakamalaot sang Department of Foreign Affairs (DFA) sang Pilipinas ang mga pahayag sang Chinese Embassy sa Manila sa social media, nga suno sa ahensya nagapadugang sang tensyon kag nagapaluya sa pagsalig sa tunga sang duha ka pungsod.
Ginpahayag sang DFA nga ang amo nga mga pahayag indi nagapakita sang dugay na nga prinsipyo sang konstruktibo nga pagpakig-angot sang Pilipinas kag China. Suno sa DFA, ginapaabot nga ang tanan nga diplomat magapakita sang nagakaigo nga pamatasan kag propesyonalismo, ilabi na sa social media.
Ginpahayag man sini nga ginareserba sang Pilipinas ang kinamatarong nga magpatuman sang dugang nga diplomatiko nga tikang kun kinahanglanon. Ang kontrobersya nagasunod sa pahayag ni Chinese Ambassador Jing Quan sang Oktubre 15, nga mahimo madaug sang China ang Pilipinas kon maggamit ini sang puwersa, bisan pa ginpahayag niya nga wala ini sang intensyon nga himuon.
Sa pihak sini, gindepensahan sang Chinese Embassy si Jing kag ginpahayag nga ginkuha sa konteksto ang iya mga tinaga. Kaangot man sini, ginpabaskog sang DFA ang pagsunod sang Pilipinas sa One China Policy matapos gin-akusahan sang Chinese Embassy si Defense Secretary Gilberto Teodoro nga ginakwestyon ang amo nga polisiya bangud sa iya ginpaambit nga post parte sa Taiwan.
Ginklaro sang DFA nga ginakilala sang Pilipinas ang People’s Republic of China bilang amo lamang ang lehitimo nga gobyerno sang China kag ginarespeto ang panindugan sini nga ang Taiwan kabahin sang teritoryo sang China.
