Nagpasalig ang Malacañang nga handa ang gobyerno sang Pilipinas nga maghatag sang bulig sa mga overseas Filipino worker (OFW) sa Europe nga mahimo maapektuhan sang nagapadayon nga kagamo kag mga protesta sa rehiyon.
Suno kay Presidential Communications Office (PCO) Undersecretary kag Palace Press Officer Claire Castro, ginabantayan ni President Ferdinand Marcos Jr. ang mga nagakatabo kag ginmanduan ang mga may kaangtanan nga ahensya nga mangin preparado sa pag-atipan sang kinahanglanon sang mga Pilipino sa mga apektado nga lugar.
Gin-athag ni Castro sa Palace press briefing nga prayoridad sang gobyerno ang kabuhi kag kaluwasan sang mga Pilipino, ilabi na sang mga OFW nga yara sa tunga sang indi malinong nga sitwasyon.
Samtang, nagabantay man si Department of Migrant Workers (DMW) Secretary Hans Leo J. Cacdac sa kahimtangan sang mga Pilipino sa Europe, partikular na sa Milan, Italy, agud masiguro nga mahatagan sila sang nagakaigo nga bulig kon kinahanglanon.
Sa pihak sini, nagalaum ang Malacañang nga indi makaapekto ang nagakatabo nga kagamo sa Europe, ilabi na sa France kag Italy, sa pag-attend sang mga representante sang Pilipinas sa palaabuton nga ASEAN Summit sa Manila sa Nobyembre.
Sa nagligad nga mga adlaw, nagpatigayon sang dalagku nga protesta sa pila ka pungsod sa Europe, lakip ang France, Italy, Portugal kag Belgium. Ang mga demonstrasyon may kaangtanan sa nagkalain-lain nga isyu, lakip na ang edukasyon, pagpabalay, pagsaka sang presyo sang mga balaklon kag pagkadiskontento sa pagdumala sang mga gobyerno.
Bangud sini, padayon nga ginamonitor sang mga awtoridad ang sitwasyon agud masiguro nga may nagakaigo nga suporta ang mga Pilipino sa iban nga pungsod.
