DA, nagpahanumdom sa publiko nga maghalong sa pagbakal sang imported nga sibuyas

Ginpahanumdom sang pamunuan sang Department of Agriculture ang publiko nga maghalong sa pagbakal sang imported nga puti nga sibuyas.

Suno kay Agriculture Secretary Francisco Tiu Laurel Jr., posible ini nga kontaminado sang salmonella kag mga delikado nga heavy metals.

Ginhimo sang kalihim ang pahayag matapos ang pila ka tonelada sang mga utan halin sa Pampanga ang nagpositibo sa amo nga bacteria.

Sa report sang mga otoridad, halin sa China ang kabug-osan nga 34 ka metric tons sang puti nga sibuyas kag ini ilegal nga naipasulod sa pungsod.

Ang Manila-based nga Leksei B. Specialized Goods Trading ang nagsilbi nga consignee sini nga shipment nga nag-abot sa Subic Port.

Padayon pa ang imbestigasyon sang mga otoridad sa natabo nga insidente.