Nagtaliwan na ang bantog nga hippopotamus nga si Fiona sa Cincinnati Zoo sa Estados Unidos matapos aksidente nga matulon ang isa ka kalo nga nahulog sa iya kulungan.
Suno kay Cincinnati Zoo Director Dave Jenike, ginhingagaw pa nga bulngon si Fiona sang mga beterinaryo kag operahan, apang wala na ini makaluwas kag nagtaliwan pagligad sang pila ka oras.
Ginpahayag ni Jenike nga daku ang ila kasubo sa pagkawala sang siyam ka tuig nga hippopotamus nga nagbug-at sing kapin 2,000 ka libra.
Nangin bantog sa bug-os nga kalibutan si Fiona sang natawo ini nga anom lamang ka semana kag wala pa sa tion sang 2017, nga nagbug-at lang sing 29 ka libra, malayo sa kinaandan nga 100 ka libra nga kabug-aton sang bag-o nga bun-ag nga hippopotamus.
Paagi sa pag-atipan sang mga tinawo sang zoo, nakat-on ini sa paglakat kag pagkaon sing husto tubtob nga nangin normal ang iya pagtubo.
Bangod sa iya kabantugan, nangin paborito si Fiona sang madamo nga tawo sa nagkalain-lain nga bahin sang kalibutan paagi sa mga litrato kag video nga ginapaambit sang zoo.








