Temporaryo nga gin-untat sang China ang pag-import sang mga baboy, wild boars, kag iban pa nga pork-related products gikan sa Pilipinas bangud sa kabalaka sa paglapta sang swine fever.
Ginpahayag sang Chinese customs authorities nga ang lihok may katuyuan nga maprotektahan ang ila livestock industry sa nasambit nga balatian.
Wala naman ginpahayag kon tubtob san-o magadugay ang pag-ban.
Ang desisyon mahimo nga may dako nga epekto sa industriya sang baboy sa Pilipinas, ilabi na nga ang mga lokal nga manugsagod sang baboy padayon nga naga-recover gikan sa epekto sang African swine fever (ASF).
Ang ASF isa ka makalalaton nga balatian nga nagaapekto sa mga baboy kag talunon nga mga baboy, samtang indi ini makatalagam sa mga tawo. Apang, dako ang epekto sini sa livestock industry bangud madamo sang domestic pigs ang nagakapatay kon maglapta ang balatian.
Padayon ang pagpatuman sang gobyerno sang Pilipinas sang mga tikang agud makontrol ang paglapta sang ASF sa pungsod.
