Ginpanginwala sang Ministry of Foreign Affairs sang China nga may kaangtanan ang ila gobyerno sa AI-generated video nga ginpagwa sang isa ka state-run media outlet, nga nagalaragway sa mga Pilipino bilang mga amu samtang ginauyatan ang 2016 Arbitral Award sa West Philippine Sea.
Suno kay Chinese Foreign Ministry spokesperson Lin Jian, wala siya sang komento sa nasambit nga video kag ginpabutyag nga indi ini obra sang gobyerno sang China.
Apang, ginpabaskog niya liwat ang malawig na nga tindog sang Beijing nga indi nila ginakilala ang 2016 South China Sea arbitral ruling, nga suno sa ila ilegal kag wala sang balor.
Samtang, nagapadayon ang tindog sang Pilipinas nga balido ang desisyon sang arbitral tribunal, nga nagasiling nga wala sang legal nga basehan ang malapad nga pag-angkon sang China sa ginaagawan nga kadagatan.
Antes sini, ginhingyo sang Department of Foreign Affairs (DFA) nga kakason sang state-run media outlet ang AI-generated video sa social media, matapos ini ilaragway sang ahensya nga racist, makainsulto, kag nagapakamalaot sa dignidad sang mga Pilipino.
