Isa ka pulis ang pilason sa ginpatigayon nga pagpresentar sang warrant of arrest batuk sa isa ka suspek sa Purok Bliss, Poblacion, Norala, South Cotabato, pasado alas 10:10 sang aga, Abril 16, 2025.
Ginkilala ang biktima nga si PMAJ. Jose Golez, hepe sang kapulisan sa nasambit nga lugar.
Suno sa inisyal nga imbestigasyon, sang ginpatigayon ang warrant of arrest batuk kay Jobert Felongco, suspek sa kaso nga may kaangtanan sa iligal nga droga, gilayon ini nga nagbuno sang pusil nga caliber .45 kag naigo si PMAJ. Golez.
Sa pihak sang insidente, na-neutralisar ang suspek kag gilayon ini nga nadakpan.
Yara na ini subong sa kustodiya sang kapulisan samtang ginaproseso ang dugang nga legal nga aksyon batuk sa iya.
Samtang, sa subong, yara na sa maayo nga kahimtangan si PMAJ. Golez kag nagapadayon ang iya pag-pabulong sa pilas sini nga naangkon.
Padayon ang imbestigasyon kag seguridad nga ginahimo sang Norala PNP agud masiguro ang katawhay sa lugar kag mapangibabawan ang mga kaso may kaangtanan sa iligal nga droga.
