Nag-abot sa 20 ka indibidwal ang napilitan nga mag-evacuate sa Barangay Morales, Koronadal City, matapos magsaka ang tubig-baha sa pila ka lugar bangud sa pag-overflow sang San Felipe Dam.
Sa interview sang Bombo Radyo Koronadal ginpahayag ni Brgy. Kagawad Hans Avance, nga lakip sa mga apektado ang mga residente sang Masagana B, Tolentino, Boundary kag Alegria, diin nag-abot sa hawak ang tubig sa pila ka lugar kag nagsulod sa mga panimalay kag boarding house.
Ginpahayag ni Avance nga halos tanan nga panimalay sa Masagana B ang nasudlan sang tubig, samtang pareho man nga sitwasyon ang naeksperyensyahan sa pila ka panimalay kag boarding house sa Tolentino.
Apesar nagasubside na ang baha sa pila ka lugar, padayon gihapon ang rescue operation, ilabi na sa Boundary. Lakip sa gin-rescue ang isa ka pamilya sa Tolentino nga may madamo nga kabataan kag temporaryo nga ginpatiner sa barangay hall.
Samtang, temporaryo nga ginapahamtang sa evacuation center ang mga apektado nga pamilya bangud indi pa luwas nga balikan ang ila mga puluy-an.
Ginahatagan man sang prayoridad ang disinfection, ilabi na sa mga kabataan nga nakatusmaw sa tubig-baha, kag ang paghatag sang pagkaon kag iban pa nga panguna nga kinahanglanon.
Dugang pa ni Avance, pila na ka beses nagapasa sang resolusyon ang barangay nga nagarekomendar nga padakuon ang San Felipe Dam agud mapauswag ang kapasidad sini sa pagpaawas sang tubig. Apang, wala sang hurisdiksyon ang barangay sa dam bangud sakop ini sang San Felipe.
Ginpaathag man niya nga limitado ang mga buho sang dam kag duha lamang ang ginabuksan bangud nagatipon ang mga debris sa tunga nga buho kon buksan ini.
Sa pihak sini, ginpanawagan ni Avance ang mga residente nga mag-report sa barangay sang mga naguba nga panimalay agud madokumentuhan kag magamit nga basehan sa paghatag sang ayuda halin sa syudad kag probinsya.
Ginpahayag man niya nga padayon ang pagbulig sang barangay sa mga residente nga nagakinahanglan sang rescue kag iban pa nga assistance.
