Gin-awhag sang Philippine High School for the Arts ang mga Grade 6 learners halin sa publiko kag pribado nga elementary schools sa bug-os nga Pilipinas nga magpartisipar sa Annual Nationwide Search for Young Arts Scholars (ANSYAS).
Sa interview sang Bombo Radyo Koronadal ginpahayag ni Jef Candido Walet, head sang ANSYAS, target sang programa nga madiskubre ang mga kabataan nga may talento sa nagkalain-lain nga disiplina sang sining ukon arts kag hatagan sang oportunidad nga mangin iskolar sang institusyon.
Lakip sa mga disiplina nga bukas para sa audition ang folk dance, ballet, creative writing, musika, pagkanta, theater arts kag visual arts pareho sang drawing, painting, sculpture kag digital arts.
Dugang ni Walet, may separado nga audition area para sa tagsa ka disiplina, nga pagapangunahan sang mga audition master nga magagiya kag magahatag sang mga buluhaton agud mapalambo ang abilidad sang mga aplikante.
Libre ang pag-audition kag ginabaton man ang walk-in applicants nga gusto magpakita sang ila talento. Sa Koronadal City, pagahimuon ang audition sa Koronadal Central Elementary School 1 nga magaumpisa alas-9 sang aga.
Paagi sa sini nga programa, handum sang Philippine High School for the Arts nga madiskubre kag mapauswag ang talento sang mga kabataan halin sa nagkalain-lain nga rehiyon sang pungsod paagi sa oportunidad nga makakuha sang arts scholarship.
