Nagapakita sang dako nga kadalag-an ang madinalag-on nga misyon sang Artemis II padulong sa bulan.
Ini ang nangin pahayag ni Peter Arvin Jabido, Bombo International News Correspondent sa USA, sa iya interview sa Bombo Radyo Koronadal.
Suno kay Jabido, ang nasambit nga misyon nagapakita sang padayon nga pag-uswag sang advanced technology kag sang kapasidad sang katawhan sa pagsulbad sang mga mabug-at nga tikang sa siyensya kag eksplorasyon.
Dugang pa niya, ini nga tikang isa ka pamatuod nga ang teknolohiya mahimo maghatag sang mas maayo nga kahimtangan sa pangabuhi sang mga tawo sa palaabuton, labi na sa patag sang komunikasyon kag inobasyon.
Ginpahayag man niya nga ang Artemis II indi lang bahin sang pagbiyahe sa bulan, kundi simbolo man ini sang pagtinir sang katawhan nga magpadayon sa pagdiskubre kag pagpalapnag sang ihibalo para sa mas progresibo nga kalibutan.
Bangud sini, ginpangabay ni Jabido sa kabataan nga kabigon ang nasambit nga misyon bilang inspirasyon kag pamatuod sang kaalam, disiplina, kag pagbinuligay sang katawhan, samtang, gin-awhag man niya ang kabataan nga magpokus sa pagtuon sang siyensya kag teknolohiya kag himuon nga inspirasyon agud mangin preparado sa mas dako nga papel sa palaabuton kag sa padayon nga pag-uswag sang sosyedad.
