KORONADAL CITY – Pilason ang isa ka dalaga matapos nga ginbuno sang iya kaugalingon nga amay sa Barangay Sto. Niño, siyudad sang Koronadal.
Ginkilala sang mga otoridad ang biktima nga si “Bhebz”, 20-anyos nga residente sang nasambit nga lugar.
Naguwa sa imbestigasyon nga nagbaisay ang biktima kag amay sini nga si Carlos Villalobos, 59-anyos kag bangud sa kaakig sang suspek ginbuno sini ang kaugalingon nga bata rason nga nagluntad ang insidente.
Sa panaysayon sang biktima, masami nga nagamaoy ang iya nga amay labi na kun nakainom ini tubtob nga ginsabat niya ini.
Naakig suno pa ang amay sini kag ginbuno ang iya abaga rason nga gindala ini gilayon sa hospiptal para sa nagakaigo nga pagbulong.
Samtang, hugot naman nga ginpanginwala sang amay nga ginbuno niya kaugalingon nga bata kundi nag-agaway lamang suno pa sila sang bata sini, nag-agaway sang kutsilyo kag aksidente nga naigo ini.
Naghingyo naman sang pasaylo ang amay sa bata sini apang desidido ang dalaga nga pasakaan sang kaso ang kaugalingon nga amay.
Nahibaluan nga matapos ang pagpamuno, gintilawan pa nga bun-on sang amay ang kaugalingon sini nga dughan apang nahingagaw ini sa pagdala sa hospital.
Sa karon nga maayo na ang kondisyon sang suspek, gindala na ini sa kustodiya sang Koronadal City Police Station.
Nahibaluan nga lima ka bulan na nga wala nagapauli ang asawa sang suspek bangud indi sini maagwanta ang pagkapalahubog kag masami pagmaoy sang iya bana rason nga naglayas ini.
Natalana naman nga pasakaan sang kaso sang kaugalingon nga bata ang amay sini.
