Nag-ako si Gina Acosta, anay special disbursing officer sang Office of the Vice President ukon OVP, nga pareho ang “standard operating procedure” sa pagdumala sang confidential funds sa OVP kag sa Davao City sang panahon nga mayor pa si Vice President Sara Duterte.
Sa impeachment trial, ginpamangkot ni Presiding Officer Senate President Francis “Chiz” Escudero si Acosta kon pareho man ang proseso nga iya ginasunod bilang special disbursing officer sa Davao City kag OVP.
Suno kay Acosta, ang confidential funds ginahatag sa security officer ukon iban nga tawo nga indi bonded..
Ang amo nga tawo nagapirma sang acknowledgment receipt kag, pagkatapos ma-liquidate ang pondo kag ma-submit ang mga dokumento sa Commission on Audit ukon COA, ginabawi ang nasambit nga acknowledgment receipt..
Ginkumpirmar man ni Acosta nga si Colonel Raymund Dante Lachica, anay lead security officer sang OVP, ang nakabaton sang apat ka tranches nga tag-125 milyon pesos nga confidential funds.
Suno pa sa iya, nakarekord sa cash disbursement record ang pag-release sang pondo kay Lachica.
Apang wala niya nadala sa hearing ang kopya sang amo nga dokumento..
Ginpaathag man ni Acosta nga ang mga acknowledgment receipt sang mga tawo nga gin-alegar nga nakabaton sang pondo sa ground amo ang mga dokumento nga gin-submit para sa audit..
Si Acosta ang ginpresentar sang prosecution bilang hostile witness sa Article I sang impeachment case batok kay Vice President Duterte, nga nag-akusar sang sistematikong pag-abuso, pag-misappropriate kag ilegal nga liquidation sang 500 milyon pesos nga confidential funds sang OVP.
