Ginlantaw sang isa ka abogado nga posible nga makaapekto ang mas lapad nga political dynamics sa pag-usisa sang impeachment proceedings batok kay Bise Presidente Sara Duterte.
Sa exclusive interview sang Bombo Radyo Koronadal kay Atty. Jasper Kent Perez, isa ka private lawyer, iya ginpahayag nga bisan pa ang Senado nagapatigayon bilang impeachment court nga may mandato maghusga base sa ebidensya, indi ini bug-os nga naka-detached sa impluwensiya sang iban nga aspeto sang gobyerno kag publiko.
Suno sa iya, ang executive branch sang gobyerno may “institutional weight” sa sistema pulitika sang Pilipinas, nga mahimo magtuga sang indi direkta sa baylo indi man malikawan nga pressure sa pila ka senator-judges, labi na kun ang mga isyu nga ginatukiban may kaangtanan sa iban nga sensitibo ukon politikal nga kaso.
Ginpunto man niya nga ang impluwensiya indi lang nagahalin sa gobyerno mismo sa baylo lakip man sa public opinion, nga isa ka importante nga factor sa desisyon sang mga senador.
Suno sa iya, ang mga senador sensitibo sa sentimyento sang publiko bangud ang ila mandato nagahalin sa nasyonal nga eleksyon, gani ang opinyon sang mga Pilipino mahimo nga dako nga papel sa direksyon sang ila boto sa impeachment.
Sa Ginpahayag sang abogado nga ang impeachment process, bisan pa legal kag constitutional, nagalawig sa tunga sang legal nga proseso kag politikal nga realidad nga nagalakip sang impluwensiya sang executive power kag publiko.
