Bitbit sa international stage ang talento sang isa ka fashion designer halin sa South Cotabato matapos mapilian nga magdisenyo sang barong para sa mga world leaders nga nagtambong sa ASEAN Summit 2026.
Sa interview sang Bombo Radyo Koronadal, ginpaambit ni Jearson Demavivas, isa ka fashion designer, nga nagbukas ang oportunidad para sa iya matapos makadesinyo siya sang mga bayo para kay First Lady Liza Araneta-Marcos, nga nangin paagi agud makilala ang iya obra sa Malacañang.
Suno sa iya, paagi sa referral nanday Sultan Kudarat Governor Datu Pax Ali Mangudadatu kag Governor Bai Mariam Sangki-Mangudadatu, nakatrabaho niya ang First Lady nga nagsuksok sang iya mga disenyo.
Bangud sini, napilian siya bilang isa sa 15 ka Filipino fashion designers nga gintugyanan sang pagdisenyo sang mga bayo para sa mga asawa sang ASEAN leaders. Sa draw sa Malacañang, natu-ka sa iya ang Japan kag India.
Nagdisenyo siya sang barong para kay Japanese Prime Minister Sanae Takaichi kag Indian Prime Minister Narendra Modi. Naglab-ot sa isa ka tuig ang preparasyon kag konsultasyon sa mga embahada agud masiguro nga nagasunod ang mga disenyo sa kultura kag tradisyon sang tagsa ka pungsod.
Ang barong para sa Japan may mga elemento sang tradisyonal nga hablon kag indigenous weaving sang Mindanao, samtang ang para sa India may handmade embroidery gamit ang pineapple fiber kag disenyo nga nagasanto sa Indian aesthetics.
Nalipay man si Demavivas sa positibo nga pagbaton sang mga lider sa iya mga obra, lakip ang interes ni Modi sa tela nga gingamit sa iya bayo.
Sa pihak sang sini nga kadalag-an, gin-amin sang designer nga nakaagi man siya sang mga rejections sa fashion competitions kag reality shows antes niya nakab-ot ang amo nga oportunidad.
Sa karon, may studio siya sa Regency Building sa Syudad sang Koronadal kag isa pa sa Syudad sang Makati.
Ginalauman ni Demavivas nga paagi sa iya mga obra, mas mapalapad ang pagkilala sa indigenous textiles, talento sang mga weaver sa Mindanao kag fashion industry sang rehiyon.













