-- ADVERTISEMENT --

Magahatag ang Japan sang ¥70 billion ukon kapin ₱28 billion nga pinansyal nga bulig sa Pilipinas agud mapabakod ang pondo sang Unified Package for Livelihoods, Industry, Food and Transport (UPLIFT) sa tunga sang padayon nga pagsaka sang presyo sang gatong kag implasyon bangud sang tensyon sa Middle East.

Suno kay Japanese Foreign Ministry Secretary Toshihiro Kitamura, ang nasambit nga pinansyal nga bulig ang ginkasa ni Prime Minister Sanae Takaichi kasunod sang iya pagtililipon kay President Ferdinand Marcos Jr. sa higayon sang ASEAN Summit.

Suno sa opisyal nga pahayag sang Tokyo, ginpasalig sang duha ka lider sang Nobyembre 16 ang pagpalig-on sang kooperasyon agud mapabakod ang ekonomiya sang duha ka pungsod.

Dugang pa ni Kitamura, importante man ang amo nga bulig sa Japan bangud masobra 1,800 ka mga kompanya sang Japan ang nagapadayon sang ila operasyon sa Pilipinas.

Samtang, nagapabilin sa idalom sang one-year national state of energy emergency ang Pilipinas bangud sa pagsaka sang presyo sang enerhiya nga nagapabudlay sa lokal nga ekonomiya.

Madumduman nga ginpirmahan ni Marcos ang Executive Order No. 110 sang Marso agud pormal nga malunsar ang UPLIFT, isa ka programa sang administrasyon nga nagatinguha nga maprotektahan ang publiko batok sa gulpi nga pagsaka sang presyo sang mga kinahanglanon.