-- ADVERTISEMENT --

Ginpahayag ni Senate President Sherwin Gatchalian nga indi pagalakipan sang pondo sa 2027 national budget ang mga proyekto sang Department of Public Works and Highways (DPWH) nga wala makasumiter sang nagakaigo nga mga dokumento bilang pamatuod nga handa na ini para sa pagpatuman.

Suno kay Gatchalian, ginahugtan sang Senado ang pagsusi sa mga proyekto nga ginapangayuan sang pondo agud masiguro nga may yara ini sang bastante nga pagtuon kag legal kag teknikal nga basehan.

Ginapaobligar sang Senado ang DPWH nga magsumiter sang lima ka importante nga dokumento, lakip na ang feasibility study, resolusyon halin sa local government units (LGUs), kag technical description sang proyekto.

Dugang pa ni Gatchalian, ang mga proyekto nga indi makakompleto sang mga kinahanglanon nga dokumento kuhaon sa ginapropuesto nga budget. Apang, mahimo pa ini liwat nga makonsiderar kun masumiter na sang ahensya ang tanan nga kinahanglanon.

Samtang, nakatakda sa Nobyembre 23 nga suguran sang Senado ang plenary deliberations para sa ginapropuesto nga 2027 national budget.