-- ADVERTISEMENT --

Ginaawhag sang Department of Science and Technology (DOST) ang publiko nga kilalahon kag suportahan ang nagkalain-lain nga inobasyon kag teknolohiya nga gina-develop sa pungsod paagi sa National Science, Technology and Innovation Week (NSTW).

Sa interview sang Bombo Radyo Koronadal kay Manalang sang DOST-Philippine Textile Research Institute, ginpahayag sini nga isa sa mga katuyuan sang nasambit nga aktibidad amo ang pagdala sang selebrasyon sa nagkalain-lain nga lugar sa Pilipinas agud mas madamo nga Pilipino ang maka-access kag makakilala sa mga bag-o nga teknolohiya.

Suno kay Manalang, paagi sa NSTW, ginahatagan sang oportunidad ang publiko nga makita kag mahibaluan ang nagkalain-lain nga research kag innovation nga ginasuportaran sang DOST.

Pinaagi sini, ginapaabot sang ahensya nga mas mapalapad ang kaalam sang mga Pilipino nahungod sa papel sang science and technology sa pagpauswag sang nagkalain-lain nga sektor kag sa paghatag sang solusyon sa mga kinahanglanon sang komunidad.