Ginpasiguro sang Pork Producers Federation of the Philippines Inc. nga mangin bastante ang suplay sang baboy sa Pilipinas para sa holiday season, nga ginalauman nga may sobra nga kapin 600,000 metric tons sa Enero 2027.
Suno kay Eric Harina, presidente sang grupo, ginabanta nga magalab-ot sa 2.3 milyon metric tons ang kabug-osan nga suplay sang baboy sa pungsod sa 2026, nga nagalakip sang 1.3 milyon metric tons nga lokal nga produksyon kag kapin isa ka milyon metric tons nga imported nga baboy.
Ini mas mataas sa ginalauman nga tinuig nga konsumo sang pungsod nga 1.7 milyon metric tons, kag ang mabilin nga suplay katumbas sang halos apat ka bulan nga konsumo.
Samtang, ginpabalik liwat ni Harina ang panawagan sang industriya nga ibalik ang 30 tubtob 40 porsyento nga taripa sa imported nga baboy kag hugtan ang inspeksyon kag random testing sa mga pantalan agud malikawan ang pagsulod sang karne nga posible kontaminado sang African Swine Fever (ASF) kag antibiotic residues.
Sa pihak sang bastante nga suplay, ginpahayag ni Harina nga nagapabilin nga nagabudlay ang lokal nga mga hog raiser bangud mas manubo ang farmgate price sang baboy kumpara sa ila production cost nga nagaabot sa P180 kada kilo.
Yara lamang sa P120 tubtob P130 kada kilo ang farmgate price sa Mindanao, P140 sa Visayas kag P165 tubtob P170 sa Luzon.
Bangud sini, nanawagan ang grupo sa gobyerno nga usisaon man ang presyo sang baboy sa merkado kag ang ginansya sang mga nagabaligya, agud masiguro nga indi lamang ang mga konsumidor kundi pati ang lokal nga mga hog raiser ang makabenepisyo.







