-- ADVERTISEMENT --

Nagalaum ang mga manugbaligya sang prutas sa Koronadal City nga magadugang ang pamakal sang mga konsumidor sa pag-abot sang Paskwa, bisan nagapadayon ang pagsaka sang presyo sang pila ka klase sang prutas.

Sa interview sang Bombo Radyo Koronadal, ginpahayag ni Webbie Bandiola, isa ka fruit vendor, nga kabahin sang naandan nga handa sang mga Pilipino ang prutas sa Paskwa, gani nagalaum siya nga magabaskog liwat ang ila baligya.

Nanawagan man siya kay Presidente Ferdinand Marcos Jr. kag sa gobyerno nga magpatuman sang nagakaigo nga tikang batok sa pagsaka sang presyo, kag tutukan ang mga dealer nga nagapataas sang balor sang mga balaklon.

Gin-agda man niya ang mga konsumidor nga magbakal gihapon sang prutas suno sa ila ikasarang, bangod ang P1,000 nga badyet mahimo nga pagkasyahon sa isa ka adlaw, depende sa kadamuon sang pagkaon kag kinahanglanon sang kada panimalay.

Dugang pa niya, nagadepende ang pagbudget sa kadamuon sang mga miyembro sang pamilya kag sa ila kinahanglanon sa pagkaon.