-- ADVERTISEMENT --

Nagapadayon ang koordinasyon sang Koronadal City Social Development Office sa nagkalain-lain nga ahensya sang gobyerno agud mapabakod ang proteksyon kag suporta para sa mga kababainhan kag kabataan, ilabi na sa kaangtanan sang nagluntad nga insidente sa Barangay Rotonda.

Sa interview sang Bombo Radyo Koronadal, ginpahayag ni Jenifer Magbanua, City Social Development Officer, nga padayon ang ila mga interbensyon para sa mga iloy nga naga-atubang sang krisis nga mahimo magbutang sa peligro sa ila kaugalingon kag sa ila mga kabataan, paagi sa koordinasyon sa City Health Office, Koronadal City Police Station, Women and Children Protection Desk kag mga opisyal sang barangay.

Dugang pa ni Magbanua, nagapatigayon man sila sang counseling kag nagahatag sang nagakaigo nga giya kag suporta sa mga iloy nga naga-atubang sang mabudlay nga sitwasyon.

Bangud sini, nagapanawagan man ang CSWD sa mga ginikanan nga mangin mas mabinantayon sa kahimtangan sang ila mga kabataan, regular nga i-monitor ang ila mga hilikuton kag magpabilin nga bukas sa komunikasyon agud indi mahadlok ang mga kabataan nga magpaathag sang ila mga problema kag kabalaka.

Gindugang pa niya nga importante man nga matun-an sang mga kabataan ang pagpamensar sing maayo antes maghimo sang mga desisyon agud malikawan ang mga sitwasyon nga mahimo magbutang sa peligro sa ila kaugalingon kag sa iban.