Patay ang isa ka tigulang nga Palestinian nga babayi kag napulo pa ang napilasan matapos sila gin-alegar gintiro sang mga Israeli settlers sa Duyuk al-Tahta, nakatundan sang Jericho sa West Bank.
Suno sa report, may pilas sa ulo ang biktima nga nagresulta sa iya gilayon nga kamatayon. Napulo naman ang nag-angkon sang pilas sa lawas tuga sang insidente.
Depensa sang Israeli military, nagpahayag nga ang pila ka mga Palestinian una nga nag-atake sa isa ka salakyan sang Israel sang Lunes sang gab-i, gamit ang isa pa ka salakyan kag iban pa nga mga armas. Ginpahayag man sini nga ginbato ang mga Israeli, nga nagtulod sa ila nga magpalupok agud ma-neutralize ang ginakabig nga pamahog.
Apang wala naman gintumod sang militar ang eksakto nga numero sang casualties ukon mga pilason sa insidente.
Natabo ang pagtiro sa tunga sang nagalala nga tensyon sa Jericho, kasunod sang pagsaylo sang pila ka mga Israeli settlers sa mga puluy-an sang mga Palestinian sang una nga adlaw sang Nobyembre. Bangud sini, may mga residente nga indi na makapauli sa ila mga propedad.
Padayon nga nagatuga sang alarma sa sulod sang mga komunidad sang Palestinian sa West Bank ang mga insidente sang pagka-violente kag ang pilit nga pagkadula sang access sa ila mga puluy-an.











