-- ADVERTISEMENT --

Masobra 100,000 ka mga indibidwal ang nagparehistro bilang bag-o nga botante sa Commission on Elections (COMELEC) halin sang nagumpisa ang voter registration period sang Nobyembre 10.

Suno kay COMELEC Chairman George Erwin Garcia, padayon ang pagbaton sang komisyon sang mga aplikante samtang dungan nga gina-address ang mga isyu sa mga registration sites agud masiguro ang mas matawhay kag komportable nga proseso.

Ang mga ginpatuman nga mga pag-uswag nagalakip sang paghatag sang dugang nga pulungkuan para sa mga nagahulat kag pagsaylo sang mga machines sa pagparehistro sa ground floor.

Ini nga mga tikang nagatuyo nga mangin mas madali matigayon ang proseso sang pagparehistro, ilabi na para sa mga tigulang kag mga may Person with Disability (PWDs).

Ginhatagan man pagtamod ni Garcia nga lubos nga libre ang voter registration kag ang paghatag sang voter’s certificate. Indi dapat gina-require ang mga aplikante nga magbayad sang bisan ano nga balayran para sa sini nga mga serbisyo.

Bangud sini, ginahingyo sang COMELEC sa publiko nga gilayon nga i-report ang sin-o man nga registration personnel ukon site nga nagapangayo sang bayad kabaylo sang pagparehistro ukon pag-isyu sang mga dokumento.

Gina-engganyo ang mga kwalipikado nga mga pumuluyo nga kuhaon ini nga kahigayunan sa pagparehistro, nga nagapamatuod sang ila partisipasyon sa palaabuton nga eleksyon.