-- ADVERTISEMENT --

Nagpanawagan si Senator Imee Marcos sang mas madasig kag mas epektibo nga tikang diplomatiko agud mapatuman ang isa ka mabakod nga Code of Conduct sa West Philippine Sea sa tunga sang nagapadayon nga tensyon sa rehiyon.

Ini kasunod sang pahayag ni US President Donald Trump nga indi siya nabalaka sa sitwasyon sa nasambit nga kadagatan kag masolbar pa ang nagatuhaw nga problema.

Ginpahayag niya ini sa iya bilateral meeting upod kay President Ferdinand Marcos Jr. sa Malacañang, sang ginpamangkot parte sa posibilidad nga gamiton sang Amerika ang Mutual Defense Treaty kon maglala ang sitwasyon.

Dugang pa ni Imee, kinahanglan man sang mas konkreto nga tikang agud untaton ang kagamo kag kinagamo sa Myanmar.

Ginkilala man sang senador ang pila ka nahimo sang Pilipinas sa pagpanguna sini sa ASEAN subong 2026, lakip ang ASEAN Digital Economy Framework Agreement, kooperasyon sa regional power grid kag pagpakigbato sa transnational online crimes.

Apang ginpamangkot niya ang gin-report nga ₱22.9 bilyon nga nagasto sang Pilipinas sa pag-host sang ASEAN Summit.

Suno sa iya, dapat usisaon kon nagakabagay bala ang mga benepisyo sang nasambit nga diplomatic achievements sa daku nga kantidad nga gin-gamit, labi na sa tunga sang pagsaka sang presyo sang mga baraklon kag mga problema sa ekonomiya nga gin-atubang sang mga Pilipino.