Nag-abot na sa 85 tubtob 90 porsyento ang pagkompleto sang negosasyon para sa Code of Conduct (COC) sa West Philippine Sea, suno kay Presidente Ferdinand Marcos Jr.
Ginpahayag sang presidente nga nabilin na lamang ang pagpasin-o sang mga depinisyon kag pila ka parapo sa dokumento agud masiguro nga mangin klaro sa tanan nga miyembro sang ASEAN ang mga pagsulundan nga nakasaad diri.
Suno sa iya, kinahanglan nga mapili sing maayo ang mga tinaga nga gamiton sa kasugtanan agud malikawan ang lain-lain nga interpretasyon parte sa mga patakaran sa kadagatan.
Samtang, ginpabakod sang ASEAN kag China ang ila komitment nga ipadayon ang mga konsultasyon kag negosasyon tubtob makompleto ang katapusan nga hugna sang COC.
Ginalauman nga magatindog ang kasugtanan suno sa mga prinsipyo sang United Nations Convention on the Law of the Sea (UNCLOS) kag magaserbi nga giya sa husto nga pagginawi sang nagkalain-lain nga partido sa kadagatan.













