Nagkasugot ang mga lider sang Association of Southeast Asian Nations (ASEAN) nga magpatuman sang progress-based approach sa pag-atubang sang krisis sa Myanmar, kun sa diin kinahanglan anay makita ang konkretong pag-uswag antes mapasag-uli ang representasyon sang nasambit nga pungsod sa mga aktibidad sang rehiyon.
Suno kay Presidente Ferdinand Marcos Jr., bangud komplikado ang sitwasyon sa politika sang Myanmar, kinahanglan nga ang solusyon sa krisis magahalin mismo sa mga pumuluyo kag lider sang nasambit nga pungsod paagi sa prinsipyo nga “Myanmar-led” kag “Myanmar-owned.”
Bangud sini, nagkasugot ang mga miyembro sang ASEAN nga unahon ang gilayon nga paghatag sang humanitarian assistance sa mga pumuluyo nga naapektuhan sang nagapadayon nga krisis.
Ginpabug-atan man ang importansya sang padayon nga kooperasyon sang mga pungsod sa rehiyon agud mabuligan ang Myanmar sa pag-atubang sang krisis kag makab-ot ang malinong nga sitwasyon.













