-- ADVERTISEMENT --

Ginpakita ni Presidente Ferdinand Marcos Jr. ang pag-uswag kag pag-finalize sang Digital Economy Framework Agreement (DEFA) bilang isa sa mga importante nga nahimo sang Pilipinas sa tion sang pagserbi sini bilang chair sang ASEAN subong nga 2026.

Suno sa presidente, resulta ang amo nga kasugtanan sang pila ka bulan nga pagplano, konsultasyon kag serye sang mga miting upod sa mga pungsod nga miyembro sang ASEAN nga nagsugod sang Enero sini nga tuig.

Ginpasalamatan man ni Marcos ang kooperasyon kag pagkamabinuligon sang mga lider sang rehiyon sa pagtakda sang tagsa nila ka responsibilidad kag kontribusyon para sa pagpatuman sang isa ka komon nga kasugtanan.

Tumong sang DEFA nga mapalig-on ang digital nga ekonomiya kag kinagamo sang mga pungsod sa rehiyon, lakip ang pagpaayo sang sistema sang pagpaambit sang enerhiya, pagpalapnag sang renewable energy kag pagpreparar sa posible nga krisis sa suplay sang petrolyo.

Kabahin man sa ginahatagan sang atensyon ang pagsiguro sang bastante nga suplay sang pagkaon kag pagpalig-on sang kooperasyon sa tunga sang mga pungsod.

Para kay Marcos, importante ang paghiusa kag pagkoordinar sang mga miyembro sang ASEAN agud makapatuman sang konkreto nga mga programa para sa malawig nga pag-uswag kag kauswagan sang bug-os nga rehiyon.