Indi na lang pagtrabaho ang kinahanglan himuon para magka-bonus, kundi pagdalagan man!
Daw kinahanglan na mag-training para sa marathon ang mga empleyado sang isa ka kumpanya sa Guangdong, China agud makakuha sang mas dako nga benepisyo.
Sa baylo nga performance sa trabaho ang mangin basihan sang bonus, ginpatuman sang kumpanya ang sistema nga nagabase sa kalayuon nga nadalagan sang ila mga empleyado kada bulan.
Suno sa chairman nga si Lin Zhiyong, nagadepende ang kantidad sang bonus sa kadamuon sang milya nga nalab-ot sang tagsa ka empleyado sa ila pagdalagan.
Ang mga empleyado nga makakompleto sang 62 miles kada bulan ang may tion nga makakuha sang annual bonus nga katumbas sa 130 porsyento sang ila isa ka bulan nga sweldo.
Para naman sa mga makadalagan sang 31 miles kada bulan, may premyo sila nga annual bonus nga katumbas sa isa ka bulan nga sweldo.
Luwas sini, may dugang pa nga insentibo para sa mga mas determinado magdalagan.
Ang mga empleyado nga makakompleto sang 31 miles kada bulan sa sulod sang anum ka asod-asod nga bulan pagahatagan sang libre nga pares sang running shoes.
Samtang, ang mga makadalagan sang 19 miles kada bulan may katungdanan nga makabaton sang annual bonus nga katumbas sa 30 porsyento sang ila bulanan nga sweldo.
Sa sini nga sistema, daw indi lang productivity sa opisina ang kinahanglan bantayan sang mga empleyado, kundi pati man ang ila mga sapatos kag running distance!







