-- ADVERTISEMENT --

Gin-aprubahan ni President Ferdinand Marcos Jr. ang Executive Order No. 131 nga nagatukod sang Artificial Intelligence (AI) Governance Framework kag National Artificial Intelligence Council (NAIC) agud magiya ang responsable nga paggamit kag pagpauswag sang AI sa Pilipinas.

Ginpirman ang kamanduan sang Nobyembre 12 bilang basehan sa paghimo sang mga polisiya, regulasyon kag programa para sa AI development sa pungsod.

Suno kay Palace Press Officer Undersecretary Claire Castro, ginakabig sang administrasyon ang AI nga importante nga teknolohiya nga makabulig sa mga Pilipino, negosyo kag komunidad.

Apang kinahanglan masiguro nga ang paggamit sini mangin luwas, responsable kag etikal agud maprotektahan ang publiko.

Sa idalom sang kamanduan, ang NAIC ang magadumala kag magamonitor sang implementasyon sang AI Governance Framework.

Pangunahan ini sang Executive Secretary bilang chairperson, samtang ang Department of Economy, Planning, and Development ang mangin vice chairperson.

Magakabig man nga mga miyembro ang Department of Information and Communications Technology (DICT), Department of Science and Technology (DOST), Department of Trade and Industry (DTI), Department of Education (DepEd), Department of Labor and Employment (DOLE), Department of Budget and Management (DBM), Commission on Higher Education (CHED), kag Technical Education and Skills Development Authority (TESDA), upod ang isa ka representante halin sa pribado nga sektor.

Paagi sa sini nga tikang, ginatuyo nga mapalapad ang benepisyo sang AI sa pungsod samtang ginapasiguro ang proteksyon kag kaayuhan sang mga Pilipino.