Naglab-ot na sa 80 porsyento ang pagkompleto sang negosasyon sa ginapanukala nga Code of Conduct (COC) sa South China Sea sa tunga sang mga pungsod sa Southeast Asia kag China, samtang nagapadayon ang prepasyon para sa ASEAN Summit.
Suno kay Department of Foreign Affairs (DFA) Secretary Ma. Theresa Lazaro, nakabulig ang pagpangulo sang Pilipinas bilang chair sang ASEAN sa pagpadali sang negosasyon.
Ginpahayag niya nga kalabanan sang mga probisyon kag dokumento sang kasugtanan natapos na, apang may pila pa ka detalye nga kinahanglan repasuhon kag pauswagon.
Ginatumod sang COC nga maghatag sang klaro nga mga panuntunan agud malikawan ang tensyon, komprontasyon kag posible nga kinagamo sa West Philippine Sea.
Nagalaum man ang administrasyon nga mapirmahan ang kasugtanan antes matapos ang pagpangulo sang Pilipinas sa ASEAN.
