Ginpasiguro ni Defense Secretary Gilberto Teodoro Jr. sang Martes nga suportado sang mga miyembro nga pungsod sang Association of Southeast Asian Nations (ASEAN) ang pagpanguna sang Pilipinas sa ASEAN Defense Ministers’ Meeting-Plus (ADMM-Plus), samtang ginpanginwala ang akusasyon sang China nga hungod nga ginpunggan sang Manila ang pagpartisipar sang Beijing sa nasambit nga regional security mechanism.
Suno kay Teodoro, wala sing iban nga miyembro sang ASEAN ang nagkuwestyon sa pagpanguna sang Pilipinas sa mga miting nga ginhiwat sa Cebu, luwas sa China nga amo lamang ang nagpabutyag sang kritisismo.
Sa isa ka interview, ginpahayag sang mamalidha nga nangin madinalag-on ang ADMM kag ADMM-Plus kag naghatag ini sang dungog sa Pilipinas, partikular sa Department of National Defense (DND), Armed Forces of the Philippines (AFP), Philippine National Police (PNP) kag Bureau of Jail Management and Penology (BJMP).
Ginkilala man niya ang kontribusyon sang nagkalain-lain nga partner agencies, lakip ang lokal nga mga panguluhan kag mga pumuluyo sang Cebu Province, Cebu City kag Lapu-Lapu City, sa madinalag-on nga pagpahigayon sang mga miting.
