Nagpahayag sang kabalaka ang Philippine Drug Enforcement Agency ukon PDEA South Cotabato sa naobserbahan nga pagbalik sang mga aktibidad nga may kaangtanan sa illegal nga droga sa probinsya.
Suno kay IA V Brenda Joy C. Pollisco, Provincial Officer sang PDEA South Cotabato, daku ang kinalain sang sitwasyon sang illegal nga droga subong kon ikumpara sa nagligad nga administrasyon ni anay Presidente Rodrigo Roa Duterte.
Suno sa iya, sang amo nga administrasyon, mas mabaskog ang suporta nga nabaton sang ila ahensya sa kampanya kontra illegal nga droga, rason kun ngaa nahadlok ang mga nagabaligya kag nagagamit sini ukon mga pusher and user.
Apang, subong, nasubo gid sila nga makita pa ang iban sa social media ang pila ka indibidwal nga nga nagapakita sang ila paggamit sang illegal nga droga, kag may mga nagavideo pa mismo sang ila kaugalingon, nga daw wala man lang sing kahadlok, nga daw normal lang saila para i-post ni.
Dugang pa ni Pollisco, posible nga may kaangtanan man ini sa pagbag-o sang prayoridad sang administrasyon subong, kay suno pa kay Pollisco mas nagahatag sang pagtamod sa rehabilitation ukon rehabilitasyon sang mga nagagamit sang illegal nga droga ang subong nga pang gobyerno.
Para sa dugang nga detalye pamatian naton ang pahayag ni IA V Brenda Joy C. Pollisco, Provincial Officer sang PDEA South Cotabato.
Sa sini nga sitwasyon, importante gid Bombo Charles nga indi madula ang atensyon sa problema sang illegal nga droga. Kinahanglan nga may padayon nga pagmonitor ang mga otoridad, upod man ang paghatag sang husto nga impormasyon kag giya sa publiko, agud malikawan ang paglapta sini nga problema.
Bangud sa ulihi, indi lamang ini responsibilidad sang PDEA ukon sang mga otoridad, kundi may papel man ang tagsa-tagsa naton sa pagpangapin sang aton pamilya kag komunidad batok sa malain nga epekto sang illegal nga droga.
