Wala ginbalabagan sang kalayuon ang apat ka boluntaryo nga blood donor halin sa Barangay Poblacion, Buluan, Maguindanao del Sur agud makapakigbahin sa Dugong Bombo 2026 sang Bombo Radyo Koronadal.
Sa interview sang Bombo Radyo Koronadal kay Nerwin Fallusco, isa sa mga blood donor, ginpahayag niya nga kinaandan na nila sang iya duha ka kaupdanan ang pagpakigbahin sa nagkalain-lain nga bloodletting activity bilang paagi sang pagbulig sa mga tawo nga nagakinahanglan sang dugo.
Suno kay Fallusco, temprano pa sila nagbiyahe halin sa Buluan agud masiguro nga makaabot sila sa Koronadal City kag makapakigbahin sa aktibidad.
Ginpaambit man niya ang iya kalipay nga liwat makadonar sang dugo kag mangin kabahin sa inisyatibo nga nagatinguha nga makabulig kag makaluwas sang kabuhi.
Bangud sini, gin-awhag niya ang publiko nga indi magduha-duha sa pagdonar sang dugo kag magpakigbahin sa kasubong nga aktibidad, bangud ang simple nga paghatag sang dugo mahimo mangin dako nga bulig kag paglaum sa mga nagakinahanglan sini.
Para kay Fallusco, indi kinahanglan mangin kilala ukon may espesyal nga ikasarang agud mangin baganihan, bangud ang pagdonar sang dugo isa na ka paagi sang pagluwas sang kabuhi sang isigkatawo.
