Naglab-ot sa ₱9.99 bilyones ang kabug-usan nga kahalitan nga narekord sa sektor sang agrikultura bangud sang El Niño phenomenon sa pungsod, nga nag-apekto sa masobra 324,000 ka mga mangunguma sa nagkalainlain nga mga rehiyon.
Suno sa pinakaulihi nga report halin sa Department of Agriculture (DA) nga ginpaguwa sini nga Semana, ini nga numero mas mataas sangsa ₱8.57 bilyones nga kahalitan nga narekord sang Oktubre 21.
Ginabulubanta nga 323,419 ka ektarya sang uma ang apektado nga nagresulta sa pagkadula sang 288,424 metriko tonelada sang pananom.
Ang produksyon sang mais ang nag-antos sang pinakadaku nga kapierdihan, nga naglab-ot sa ₱5.63 bilyones, samtang ang kahalitan sa mga tanom nga humay naglab-ot sa ₱3.65 bilyones.
Ang mga rehiyon nga apektado amo ang Cordillera, Ilocos Region, kag Cagayan Valley, subong man ang pila ka bahin sang Visayas kag Mindanao.
Nagapakita ang datos sang kadakuon sang epekto sining tuman nga mga kondisyon sang panahon sa palangabuhian sang mga mangunguma kag sa produksyon sang mga nagapanguna kag importante nga mga pananom sa pungsod.
