Padayon ang paghinun-anon sang lokal nga panguluhan sang Koronadal City kag sang tagdumalahan sang Yellow Bus Line (YBL) tuhoy sa plano nga ibalik ang operasyon sang kompaniya sa Koronadal City Integrated Public Terminal.
Suno kay Koronadal City Mayor Erlinda P. Araquil, nagapadayon ang pagpakig-angot sang duha ka partido agud masulbar ang mga isyu kag masarangan ang mga kinahanglanon antes mapatuman ang pagbalik sang YBL sa nasambit nga terminal.
Ginalauman nga ang pagbalik sang kompaniya sa terminal makadugang sa mga kapilian sang mga pasahero sa ila pagbiyahe, ilabi na ang mga nagasalig sa serbisyo sang bus bilang panguna nga paagi sa pagpanakayon pakadto sa nagkalain-lain nga lugar.
Dugang pa, mahimo man ini makabulig sa pagpaayo sang pagserbisyo sa transportasyon kag sa pagpasayon sang pagsakay kag paglakat sang mga pasahero sa syudad.
Apang, sa karon, wala pa sang pinal nga petsa nga gintalana para sa pagbalik sang bug-os nga operasyon sang Yellow Bus Line sa Koronadal City Integrated Public Terminal bangud nagapadayon pa ang paghinun-anon sang duha ka partido.
