Gin-ako sang police corporal nga imbolbado sa aksidente nga nagbunggo-patay sa isa ka 8-anyos nga bata sa Koronadal City ang iya pagkasangkot sa insidente samtang ginamaneho ang police patrol car.
Sa interview sang Bombo Radyo Koronadal, ginpahayag ni Police Lt. Col. Harold Cornel, Chief of Police sang Koronadal City Police Station, nga wala nagtinguha nga magpalagyo ang nasambit nga pulis matapos ang aksidente.
Apang bangud sa madasig nga pagpadalagan sini, malayo na ang nauntatan sang patrol car halin sa lugar sang insidente.
Ginpahayag man ni Cornel nga ang mga otoridad, lakip ang kapulisan, mahimo lamang mangin exempted sa paglabay sa pula nga traffic light kon may importante nga emerhensya nga kinahanglan respondehan, ukon may ginahatod ukon gina-escortan nga mataas nga opisyal nga indi dapat madugayan.
Ginpabug-atan man niya nga kinahanglan magsabat sa layi ang nasambit nga pulis sa iya pagkasangkot sa aksidente kag ginpasiguro nga mahatagan sang hustisya ang pamilya sang napatay nga bata.
