Wala anay plano ang Malacañang nga magpatunga sa kontrobersiya nahanungod sa ginapahayag presensya sang personal staff ni anay House Speaker Martin Romualdez samtang yara ini sa New Quezon City Jail.
Suno kay Palace Press Officer Claire Castro, kinahanglan anay nga mahibaluan kag mapatin-aw ang matuod nga rason kun ngaa kinahanglan ni Romualdez ang personal nga asistensya samtang yara sa prisohan, lakip na ang ginapahayag nga 24-hour assistance nga ginaaligar nga ginahatag sa anay House Speaker.
Ginpahayag ni Castro nga importante nga masuta kun ano gid ang kinaiya sang nasambit nga asistensya kag kun may nagakaigo nga basehan ini suno sa mga patakaran sang pasilidad. Kinahanglan man nga masiguro nga wala sang ginatamod nga espesyal nga pribilehiyo ang bisan sin-o nga personero nga yara sa kustodiya sang mga otoridad.
Apang, gin-insister sang Palace official nga kun mapamatud-an nga may nagakatabo nga special treatment ukon indi patas nga pagtratar sa anay House Speaker, indi ini dapat ginatugutan kag kinahanglan nga aksyunan sang nagakaigo nga mga otoridad.
Nagpanawagan man si Castro nga ipaidalom anay sa nagakaigo kag patas nga imbestigasyon ang isyu antes maghatag sang konklusyon ang publiko. Suno sa iya, kinahanglan nga ibase sa kamatuoran kag ebidensya ang tanan nga pahayag agud malikawan ang paglapta sang mga akusasyon nga wala pa napamatud-an.
Samtang, gindayaw man ni Castro ang columnist nga si Ramon Tulfo matapos nga gin-ako sini ang iya sala kag nagpangayo sang pasaylo sa iya pagbawi sang nauna nga pahayag nga nakagwa na sa prisohan si Romualdez.
