Ginpanindugan liwat ni PCol. Allen Rae Co, hepe sang Public Information Office sang Philippine National Police (PNP), ang nauna nga pahayag ni Interior Secretary Jonvic Remulla parte sa posibilidad nga mag-abot sa sobra 10 mil ka pulis ang ipadala kon may matabo nga komprontasyon sa pagdakop kay Senador Ronald “Bato” dela Rosa.
Suno kay Co, ang pahayag ni Remulla may kaangtanan sa pagpanghanda sang kapulisan para sa bisan ano nga posible nga sitwasyon nga mahimo magluntad sa pagpatuman sang ila operasyon.
Dugang pa, ginpahayag niya nga kabahin ini sang ila responsibilidad nga masiguro ang seguridad sang mga operatiba kag mapatuman ang mando sang kasuguan sa nagakaigo nga pamaagi.
Samtang, padayon nga ginabantayan ang mga kasunod nga tikang sang PNP sa pagpangita kag pagdakop sa senador, ilabi na sa posibilidad sang indi malikawan nga komprontasyon sa tunga sang mga otoridad kag mga tawo nga mahimo magkontra sa operasyon.
