sa mga pasilidad sang enerhiya kag nagkalain-lain nga imprastruktura sa Ukraine.
Suno kay Ukrainian President Volodymyr Zelenskyy, lakip sa gintarget sang pag-atake ang isa ka clinical hospital sa Kharkiv, diin madamo nga sibilyan ang nagapaidalom sang pagbulong. Bangod sa mabaskog nga pagpamomba, nag-angkon sang daku nga halit ang amo nga pagamutan.
Dugang pa ni Zelenskyy, ang panguna nga ginatuyo sang Russia amo ang pag-atake sa mga pasilidad sang kuryente kag enerhiya nga yara sa nagkalain-lain nga rehiyon sang ila pungsod.
Ginkabig sang Ukrainian president nga malapad kag madugo ang amo nga operasyon bangod indi lamang mga pasilidad sang gobyerno ang apektado kundi pati man ang ordinaryo nga mga pumuluyo.
Bangod sa pag-atake, ginatos ka libo nga mga residente ang nadulaan sang suplay sang kuryente, nga mahimo magdugang sa kabudlayan sang mga komunidad nga apektado sang nagapadayon nga inaway.
Sa pihak sini, ginpabutyag ni Zelenskyy nga panagutin sang ila gobyerno ang mga responsable sa pag-atake kag magahimo sang nagakaigo nga tikang bilang sabat sa natabo.
