Ginapanawagan ni Bicol Saro Party-list Representative Terry Ridon ang pagrepaso sa mga kasuguan nahanungod sa libel kag cyberlibel agud maproteheran ang reputasyon sang mga tawo, samtang ginapasiguro nga mapabilin ang kahilwayan sang pamamahayag.
Suno kay Ridon, indi dapat mahadlok ang mga mamamahayag sa pagpamangkot kag pagreport sang mga isyu nga may kaangtanan sa interes sang publiko bangud sa posibilidad nga mapasakaan sila sang kaso.
Ang panawagan nagasunod sa pag-aresto sa beterano nga journalist nga si Philip Lustre Jr. sang Oktubre 24 sa Quezon City, may kaangtanan sa cyberlibel complaint nga ginpasaka ni Atty. Manases “Mans” Carpio, bana ni Vice President Sara Duterte.
Gin-athag ni Ridon nga ang katuyuan sang pagrepaso indi ang pagtugot sa pagpalapta sang sayop nga impormasyon, kundi ang pagsiguro nga patas ang pagpatuman sang kasuguan kag indi ini magamit sa pagpahipos sang mga mamamahayag nga nagatuman sang ila katungdanan.
Ang panawagan nagabukas liwat sang diskusyon tuhoy sa pagbalanse sang proteksyon sa reputasyon sang mga indibidwal kag sang kinamatarong sang media nga mag-usisa kag magbalita sang mga isyu nga importante sa publiko.
