Gin-athag sang Philippine National Police (PNP) nga indi bag-o ang litrato nga nagapakita kay Senador Ronald “Bato” Dela Rosa upod ang pila ka indibidwal sa isa ka sementeryo, matapos ini maglapta sa social media sa tion sang Undas.
Suno kay Police Colonel Allen Rae Co, hepe sang PNP Public Information Office, kapin tatlo na ka tuig ang nagligad sang makuha ang nasambit nga litrato.
Nagguwa ang pagpaathag sang PNP matapos nagdulot sang mga espekulasyon ang paglapta sang litrato nga posible liwat nga nakita ang senador sa Digos City, Davao del Sur, sa tunga sang padayon nga pagpangita sa iya sang mga awtoridad.
Madumduman nga padayon nga ginapangita sang mga otoridad si Dela Rosa may kaangtanan sa arrest warrant nga ginpagwa sang International Criminal Court (ICC) bangud sa alegasyon nga krimen batok sa katawhan ukon crimes against humanity nga may kaangtanan sa war on drugs sang nagligad nga administrasyon.
Nagpatigayon man ang Department of the Interior and Local Government (DILG) sang P50 milyon nga pabuya para sa bisan sin-o nga makahatag sang impormasyon parte sa lokasyon sang senador nga magadul-ong sa iya pagkadakop.
Sa subong, wala pa gihapon matumod sang kapulisan ang eksakto nga nahamtangan ni Dela Rosa.
