Nagpakita sang determinasyon ang Filipina tennis star nga si Alex Eala matapos mag-alsa halin sa pagkadula sang una nga set kag pildihon ang Australian player nga si Talia Gibson sa Round of 16 sang Toray Pan Pacific Open sa Japan.
Nakuha anay ni Gibson ang first set, 6-4, apang nagbag-o ang dagan sang duwa sang nagpakita si Eala sang mas agresibo nga pag-atake kag mas maayo nga kontrol sa ikaduha nga set, nga iya gin-angkon sa iskor nga 6-2.
Nagpadayon ang pagdominar sang Pinay tennis star sa deciding set, diin wala na siya nagtugot kay Gibson nga makapuntos, antes gintapos ang duwa sa 6-0 nga iskor agud masiguro ang iya puwesto sa quarterfinals.
Sa pihak sang mabudlay nga pagsugod, ginpahayag ni Eala nga importante nga mapabilin ang konsentrasyon kag gamiton ang mga kahigayunan sa sulod sang duwa.
Nagpasalamat man siya sa mga Pilipino nga nagkadto sa Japan agud personal nga siya suportahan, kag nagpahayag sang handum nga makita liwat ang iya mga tagpalamati sa masunod nga hugna sang torneo.
