Naghatag sang nagkalain-lain nga bulig ang Department of Social Welfare and Development Field Office IX (DSWD FO IX) sa 800 ka Pilipino nga gin-deport halin sa Sabah, Malaysia, nga nag-abot sa Zamboanga City Port.
Nag-abot ang grupo pasado alas-8 sang gab-i matapos nga ginbalhin sila halin sa tatlo ka detention center nga nahamtang sa Sandakan, Papar kag Tawau sa Malaysia.
Suno sa DSWD FO IX, amo ini ang ikaduha nga grupo sang mga Pilipino nga ginpauli sa pungsod kag ginbaton sa Zamboanga City sa sini nga tuig, halin sang liwat nga ginbuksan ang operasyon sang deportasyon, kun sa diin nag-abot an una nga grupo sang Enero 2026.
Sa kabug-usan nga 800 ka deportees, 589 ang mga lalaki nga adulto, 89 ang mga babayi nga adulto, samtang 122 naman ang mga menor de edad nga wala pa nag-edad 12.
Sa mga kabataan, 64 ang lalaki kag 58 ang babayi.
Ginpatigayon ang pagbaton kag pagbulig sa mga nag-abot paagi sa pagbinuligay sang nagkalain-lain nga ahensya sang gobyerno kag humanitarian organizations, sa koordinasyon sang International Organization for Migration (IOM).
Nag-upod sa operasyon ang Philippine Red Cross, Action Against Hunger, Department of Health, Office of Civil Defense, Philippine Coast Guard, Philippine Air Force kag Philippine National Police.
Nagbulig man ang lokal nga panguluhan sang Zamboanga City paagi sa City Engineer’s Office kag Office of the City Environment and Natural Resources.
Ang amo nga koordinado nga operasyon nagtumong sa pagsiguro nga mahatagan sang nagakaigo nga assistance ang mga Pilipino nga ginpauli sa pungsod, ilabi na ang mga kabataan kag iban pa nga mas kinahanglan sang dugang nga pag-atipan matapos ang ila pagbalik halin sa Malaysia.
